नुवाकोट । एसइई परीक्षामा ४ जिपिए ल्याउने तीन जना विद्यार्थीलाई तारकेश्वर गाउँपालिकाले जनही रु. ५० हजारसहित ‘गाउँपालिका अध्यक्ष प्रोत्साहन पुरस्कार’ प्रदान गरेको छ ।

गाउँपालिका अध्यक्ष शिव अधिकारी अविरलले दाङसिङस्थित गाउँपालिका कार्यालयमा आयोजित ‘शिक्षक, विद्यार्थी र विद्यालय सम्मान तथा वार्षिक शैक्षिक क्यालेण्डर विमोचन कार्यक्रम’मा गाउँपालिकाका स्थायी बासिन्दा भई एसइईमा ४ जिपिए ल्याउन सफल प्राजन प्रधान, सम्पदा श्रेष्ठ र दिलासा पौडेललाई उक्त पुरस्कार हस्तान्तरण गर्नुभएको हो ।

त्यसैगरी, गत वर्षको एसइई परीक्षामा गाउँपालिकाभित्रका विद्यालयमध्ये उत्कृष्ट नतिजा ल्याउने श्रीकृष्ण माविकी छात्रा सुनिता रोक्का र छात्र पवन ढकाललाई जनही रु. ८ हजार नगद, सम्मानपत्र तथा दोसल्लासहित सम्मान गरिएको छ । उत्कृष्ट नतिजा हासिल गर्ने विद्यालय श्री शङ्खादेवी माविलाई नगद रु. २५ हजारसहित प्रशंसापत्र र दोसल्लाले सम्मान गरिएको गाउँपालिकाले जनाएको छ ।

कार्यक्रममा विभिन्न विद्यालयका उत्कृष्ट नतिजा दिलाउने शिक्षकहरूलाई समेत नगद पुरस्कार, सम्मानपत्र र दोसल्लासहित सम्मान गरिएको थियो । सम्मानित हुने शिक्षकहरूमा नेपाली, अङ्ग्रेजी, गणित, सामाजिक, अर्थशास्त्र, विज्ञान तथा अतिरिक्त गणित विषयका शिक्षकहरू रहेका छन् ।

यस्तै, आधारभूत तह (कक्षा ८) परीक्षामा उत्कृष्ट नतिजा ल्याउने श्रीकृष्ण माविकी छात्रा अनिषा श्रेष्ठ र चण्डी माविका छात्र राहुल विकलाई जनही रु. ८ हजारसहित सम्मान गरिएको छ भने उत्कृष्ट विद्यालय श्रीकृष्ण माविलाई नगद रु. २० हजारसहित प्रशंसापत्र प्रदान गरिएको छ ।

सोही अवसरमा गाउँपालिकाको वार्षिक शैक्षिक क्यालेन्डर विमोचन गर्दै अध्यक्ष अधिकारीले शैक्षिक सुधार र नतिजा उकास्न सबै विद्यालयका प्रधानाध्यापक तथा शिक्षकहरूलाई जिम्मेवार र प्रतिबद्ध भएर काम गर्न निर्देशन दिनुभयो । उहाँले दुई साताअघि जारी सात बुँदे निर्देशनलाई पूर्ण रूपमा कार्यान्वयन गर्दै आगामी वर्ष अझ उत्कृष्ट नतिजा ल्याउने लक्ष्यसहित अघि बढ्न आग्रह गर्नुभयो ।