नुवाकोट । ‘वर्ल्ड अफ डान्स नेपाल २०२६’ को ग्रान्ड फिनालेमा अपर टिम डिभिजनको उपाधि जित्न सफल टिम एनटी विभिन्न देशमा हुने अन्तराष्ट्रिय प्रतिस्पर्धामा सहभागिता जनाउन जाने भएको छ ।

त्रिशूलीमा आज पत्रकार सम्मेलनमा टिम एनटीका प्रतिनिधि निर्मल तामाङले टोली अमेरिका लगायत विभिन्न अन्तर्राष्ट्रिय प्रतियोगितामा सहभागी हुन तयारी अवस्थामा रहेको जानकारी दिनुभयो। उहाँले नृत्य केवल मनोरञ्जनको माध्यम मात्र नभई उज्ज्वल भविष्य निर्माण गर्ने महत्वपूर्ण क्षेत्र भएको उल्लेख गर्नुभयो।

अन्तर्राष्ट्रिय प्रतियोगितामा सहभागिता जनाउँदा ठूलो आर्थिक खर्च लाग्ने भएकाले कलाकारहरूको सपना पूरा गर्न तथा देशको प्रतिनिधित्व गर्न आवश्यक सहयोग गरिदिन सरोकारवाला निकाय, संघसंस्था तथा शुभेच्छुकहरूलाई अपिल गर्नुभयो।

उहाँले टिमले आगामी दिनमा अझ मेहनतका साथ अघि बढ्दै अन्तर्राष्ट्रिय स्तरमा थप ठूलो सफलता हासिल गर्ने विश्वास व्यक्त गर्दै नेपालको कला, संस्कृति र प्रतिभालाई विश्वमाझ चिनाउने प्रतिबद्धता समेत जनाउनुभयो।